Tukio la ufyatuaji risasi katika Ikulu ya White House linaonesha kina cha mgawanyiko wa ndani ya Marekani

Kwa mujibu wa ripoti ya Idara ya tarjama ya Shirika la Habari la “Hawza”, Hujjatul-Islam wal-Muslimin Sayyid Sadruddin Qabanji, Imamu wa Swala ya Ijumaa wa Najaf Ashraf, katika khutba za Swala ya Ijumaa alizotoa katika Husseiniya Kubwa ya Fatimiya, Najaf Ashraf, alisema: Jijini Baghdad limefanyika tamasha la kucheza na la upotovu kwa ajili ya mwimbaji mmoja wa Syria, na napenda kuwaambia hapa kuwa kuna takwimu kutoka Baraza Kuu la Mahakama zinazoonesha kuwa visa 7,470 vya talaka vimesajiliwa ndani ya mwezi mmoja nchini Iraq. Hii ina maana gani? Ina maana kuwa tunakabiliwa na hatari ya kusambaratika kwa familia kwa sababu ya mikusanyiko hii ya starehe, nyimbo, densi na ufisadi. Tunakabiliwa na hatari ya kuvunjika kwa familia kwa sababu ya mikusanyiko ya starehe, nyimbo, densi na ufisadi

Aliongeza kuwa: Mbali na hayo, kuna pia hatari ya kiusalama, kwani nasoma takwimu za Umoja wa Mataifa (kwa kunukuu Shirika la Habari la Ujerumani) zinazosema kwamba kila baada ya dakika kumi, msichana mmoja huuawa kwa sababu ya masuala ya kingono. Wengine hudai kuwa mikusanyiko hii ni sanaa na uhuru wa kujieleza. Sisi tunakubaliana na furaha, lakini hatukubaliani na kudhoofishwa kwa maadili. Uislamu unahimiza burudani kupitia utalii, safari, michezo, mikusanyiko ya Waumini na ziara. Uislamu unakubali burudani lakini haukubali upotovu na uharibifu; kwa sababu kuna burudani yenye kujenga na kuna burudani yenye kuharibu. Uislamu unakubali sanaa yenye faida, si sanaa yenye madhara. Tunaitaka serikali yetu isimame dhidi ya mikusanyiko hii na isiruhusu iendelee.

Serikali kuu inapaswa kuchukua hatua kuhusu tukio la kulipuliwa kwenye uwanja wa gesi wa Suleimaniyah

Imamu wa Ijumaa wa Najaf Ashraf, kuhusu tukio la kushambuliwa kwa uwanja wa gesi huko Suleimaniyah, alisema: Kushambuliwa kwa viwanja vya gesi huko Suleimaniyah na kukatika kabisa kwa umeme ni jambo ambalo serikali kuu inapaswa kulishughulikia, kwa sababu Kurdistan ni sehemu ya Iraq. Na kama tutanyamaza mbele ya suala hili, ndege hizi zisizo na rubani zitahamia kwenye mikoa mingine. Kwa sababu hiyo, tunaitaka serikali kuu ichukue hatua ya kuwabaini wahusika wa vitendo hivi na kuchukua hatua za kisheria dhidi yao.

Hujjatul-Islam wal-Muslimin Sayyid Sadruddin Qabanji, kuhusu suala jingine la ndani, alisema: Baraza la Kisiasa la Kitaifa ni hatua katika mwelekeo sahihi, kwa kuwa Ahlus-Sunna wameunda baraza la kisiasa la kitaifa linalofanana na “Mfumo wa Uratibu”. Tunaamini kuwa hii ni hatua ya kuunganisha safu za Ahlus-Sunna, kwa sharti kwamba baraza hilo lifanye kazi kwa ajili ya kuunganisha misimamo na kushiriki kisiasa katika kujenga Iraq moja.

Katika masuala ya kimataifa, alisisitiza: Waalawi nchini Syria wanakabiliwa na dhuluma na ukandamizaji wa kimadhehebu, na sisi hapa tunaomba ulimwengu wa Kiarabu na Shirika la Ushirikiano wa Kiislamu linalojumuisha nchi 57 za Kiislamu, walishughulikie suala hili. Vilevile tunaitaka serikali ya Iraq ichukue hatua katika kushughulikia na kupambana na ukandamizaji huu wa kimadhehebu; Iraq ina uwezo wa kufanya hivyo, kwa kuwa inatoa misaada kwa mfumo wa sasa wa Syria.

Ufyatuaji risasi katika Ikulu ya White House unaonesha kina cha mgawanyiko wa ndani ya Marekani

Imamu wa Swala ya Ijumaa wa Najaf Ashraf, kuhusu suala jingine la kimataifa, alisema: Ufyatuaji risasi mbele ya Ikulu ya White House na kusitishwa kwa safari za ndege katika viwanja vya ndege vya Reagan, kumeifanya Marekani iingie katika hali ya sintofahamu. Tukio hili linaonesha wazi kina cha mgawanyiko wa ndani wa wananchi wa Marekani; kwa sababu mambo yamefikia Ikulu ya White House yenyewe, na hili lina maana ya mwisho wa demokrasia nchini Marekani.